ភ្នំពេញ៖ អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានចូលរួមរំលែកមរណទុក្ខជាមួយគ្រួសារអ្នកដែលបានស្លាប់ក្នុងគ្រោះរញ្ជួយដីនៅប្រទេសតួកគី និងស៊ីរី។

តាមរយៈផេកហ្វេសប៊ុក Hun Manet - C.O.Army Office លោកឧត្តមសេនីយ៍ឯក ហ៊ុន ម៉ាណែត បានបួងសួងឱ្យបេសកកម្មជួយសង្គ្រោះទទួលបានជោគជ័យ។

លោកចូលរួមសោកស្តាយជាមួយប្រជាជនតួកគី និងស៊ីរី ចំពោះគ្រោះមហន្តរាយរញ្ជួយដីធ្ងន់ធ្ងរ ដែលបានសម្លាប់ជីវិតមនុស្ស បង្កឱ្យមានរបួស និងបាត់ខ្លួនជាច្រើននាក់ ព្រមទាំងបានបំផ្លិចបំផ្លាញហេដ្ឋារចនាសម្ព័ន្ធ និងទ្រព្យសម្បត្តិឯកជនយ៉ាងដំណំ។

គិតមកពេលនេះពលរដ្ឋនៅប្រទេសតួកគី និងស៊ីរីជិត ៨ ៤០០នាក់បានស្លាប់ ខណៈមនុស្សរាប់សែននាក់ទៀតកំពុងតែជាប់គាំងនៅក្នុងអាគារដែលរលំដោយសារគ្រោះធម្មជាតិមួយនេះ។ អង្គការសុខភាពពិភពលោកប៉ាន់ស្មានថា អ្នកស្លាប់នឹងកើនឡើងដល់ ២ម៉ឺននាក់៕